FAQ
Wei an wou kann een deng Präisser gesinn?

Fir meng Präislëscht geschéckt ze kréien, braucht der mer just ze schreiwen :) Veroodt mer just w.e.g. och ären Datum, soudass ech direkt kann nokucken ob ech iwwerhaapt deen Dag nach fir iech fräi sinn.

Bitts du och verschidden Packagen un?

Jo ech bidden och verschidden Packagen un, soubal ech iech meng Präislëscht schécken ginn ech och weider dorobber an soudass der iwwer alles Wichteges mol fir d'éischt informéiert sidd!

Mir sinn interesséiert dech als Fotografin ze buchen, wei ginn mer elo fir?

Am beschten setzt der iech mat mer an Kontakt, sou kennen mer een RDV ausmaan an eis eng kéier treffen an kucken op mer op enger Wellelängt sinn. Den Dag vun ärer Hochzäit musst dir mir Vertrauen, an dat kann een just wann een sech mol kenneléiert :) 

Wou fotograféiers du?

Generell fotograféieren ech zu Lëtzebuerg selwer an och ronderëm. Ass är Hochzäit awer elo an engem ganz aneren Land kann een mech natierlech och buchen :)

Kommen "frais de déplacement" op eis duer?

Nee an jo. Ech fueren mat mengem eegenen Auto an schenken iech 100km Aller-Retour, sollt d'Route vun ärer Destinatioun dat awer iwwerschreiden, froen ech 0,50€/km. Beispill: Vun Lenneng bis op Metz sinn et bal 80km. Hin an zréck ginn et dann 160km. Berechnen dinn ech iech déi 60km.

Kann een och een "Engagement" Shooting bei dir buchen?

Jo natierlech! Sou Fotoen sinn wierklech flott well der déi kënnt benotzen bei der Personaliséierung vun ärer Hochzäit an sou gesitt der och dass et keng Hexerei ass flott Fotoen ze mann :) 

Wat geschitt wanns de eemol krank gess?

Mer hoffen natierlech dass esou eppes nimools géing geschéien mee an esou engem Fall géingt der entweder ären Acompte zréckkréien oder ech sichen iech een Fotograf (ouni Opräiss!) deen definitiv déi selwecht Qualitéit ofliwwert wéi ech. 

Wat ass wann deng Kamera futti geet?

Näischt hält éiweg, an natierlech kommen sou Situatiounen ëmmer wann een se am mannsten kann gebrauchen.. Mee ech hunn ëmmer nach eng drëtt Kamera dobäi am Fall wann esou eppes wier :) 

Wéi vill Fotoen kréien mer ongeféier?

Dat ass eng Fro déi ëmmer schwéier ze beäntwerten ass, mee ongeféier kritt der bei enger 8-10 Stonnen Reportage em déi 900-1200 beaarbecht Fotoen. Natierlech ass et ofhängeg un der Locatioun an dem Programm vun ärer Hochzäit. Di Fotoen gi vun mir eraus gesicht an och vun mir all eenzel beaarbecht. Der erhaalt e puer duebeler déi eng kéier faarweg an schwaarz wäiss sinn.

Kréien mir och déi Original Fotoen?

Nee. Éischtens mann ech op enger eenzeler Hochzäit iwwer 100GB Fotoen déi onméiglech sinn engem ze ginn an Zweetens gitt der och net bei den Bäcker an frot no den Original Ingredienten an erwaarde iech dat selwecht Resultat. Wann der just dorobber eraus sidd déi Original Dateien ze kréien sinn ech leider den falschen Fotograf fir iech. 

Wéi kréien mer Fotoen?

Bei klengen Reportage kritt der Fotoen vun mir op engem USB Stick. Bei méi groussen Reportagen kritt der Fotoen um USB an DVD. Der kritt Fotoen eng kéier an der Originalgréisst déi ech "_print" nennen, an eng kéier bëssi verklengert déi "_web" heeschen. Zousätzlech kritt der Fotoen nach an enger Onlinegalerie déi der ären Gäscht kennt schécken an déi hir Fotoen sech kennen selwer eroflueden.

Kann een eng Fotobox bei der buchen?

Et kann een se net direkt bei mir mat buchen mee ech schaffen mat enger Firma zesummen wou der se kennt direkt online buchen. Opriichten an ofriichten maachen dann entweder ech oder een aus dem Team. Fir ze buchen: www.cliqomat.lu

Wat mann mer bei schlechtem Wierder?

Dat léift Wierder kann een leider net beaflossen.. Mer probéieren den Dag selwer eis bescht, mee ech gesinn et net an eis an den Reen ze ze zwéngen, dass all eis Kleeder naass an Frisur zerstéiert sinn. En plus ass meng Kamera och Waasserschei ;) Wann et net sollt goen, huelen mer den Shooting ouni Opräiss einfach no.

Wou kann een weider Fotoen vun der gesinn?

En puer Fotoen gesäit een hei op menger Websäit, well een der méi gesinn fënnt een mech op Instagram ënnert @lovebychrissie_ (www.instagram.com/lovebychrissie_) oder op Facebook Love by Chrissie - Wedding and Couple Photographer (www.facebook.com/lovebychrissie). Wann der een RDV mat mer ausmaacht bréngen ech och mäin Portfolio mat wou der natierlech nach een méi déiwen Androck kritt.

Ginn eis Fotoen dono op Instagram oder Facebook gewisen?

Nee just wann dir dat wëllt. An mengem Kontrakt kennt der uginn ob ech dierf e puer Fotoen weisen oder net. Och wann der "jo" ukräizt froen ech iech dono awer nach weien Fotoen ech weisen well. Fotoen vun Kanner weisen ech just mat Averständnis vun den Elteren!

Wei leeft et punkto Bezuelung? Wëlls du een Acompte?

Nodeems den Kontrakt ënnerschriwwen gouf froen ech een Acompte vun 30% vum final Betrag. Den Rescht bezuelt der eréischt wann ech Fotoen ofgeliwwert hunn :)